အမေရိကမှာ သုံးလ

ဘာလိုလိုနဲ့ အမေရိက ရောက်လာတာ သုံးလ ရှိပြီပေါ့။ ကျောင်းလည်း မတက်ရသေးဘူး။ အလုပ်ကတော့ သောကြာနဲ့ စနေ နှစ်ရက်၊ ကျောင်းမရှိပေမဲ့ အလုပ်ရှိတော့ တော်သေးတာပေါ့။ ဘာပဲပြောပြော လုပ်စရာလေး ရှိနေတော့ အဆင်ပြေတယ်။

လူတွေက ပြောကြတယ်။ ရောက်တုန်း တစ်နှစ်ပဲ။ နောက်နှစ်တွေကျ အဆင်ပြေသွားရောတဲ့။ အဲဒါကြားတော့ ဟို ရေချိုးကြောက်တဲ့ ကလေးလေး ပြောသလို... ပထမဆုံး တစ်ခွက်က အေးတယ်၊ နောက်ကျ နွေးသွားရော ဆိုတော့ ဒုတိယ ခွက်ကနေ စချိုးလို့ ရမလား လို့ပဲ ပြောချင်တော့တယ်။ နောက်နှစ်မှ လာခဲ့ရ ကောင်းသား လို့ပေါ့။ :D

ကျနော့် အနေနဲ့က ဘာမှ ပြဿနာ မရှိပါဘူး။ ရှိတဲ့ ပြဿနာက ဒီလိုဗျ...

ကျနော့်ဘဝမှာ လိုချင်တဲ့ အရာလေးတွေ ရှိခဲ့ဖူးတယ်။ သံသေတ္တာကြီးနဲ့ အပြည့် ထည့်ထားတဲ့ ရွှေဒင်္ဂါးတွေ လိုချင်တာတို့... အင်ဂျလီ နာဂျိုလီတို့ မွေးစားတာ ခံချင်တာတို့... ဂျော့ခ်ျဘုရှ် သမီးနှစ်ယောက်ထဲက တစ်ယောက်ယောက်နဲ့ တွဲဖို့... လို မဖြစ်နိုင်တာတွေလည်း မဟုတ်ပါဘူး။ ပိစိလေးတွေပါ။ ဥပမာ လောလောဆယ်ဆို ဂစ်တာလေး တစ်လက် လိုချင်တယ်။ ကျောင်း စတက်ချင်ပြီ။ ရှိခဲ့သမျှ ကွန်ပျူတာတွေ အားလုံးမှာ တစ်ခုမှ ဂရပ်ဖစ်ကတ် ကောင်းကောင်းလေး မပါလို့ ငါးနှစ်လောက် မဆော့ဖြစ်တဲ့ Generals (Zero Hour) ဆော့ချင်တယ်... အဲလို ပိစိလေးတွေပါပဲ။

အဲလိုပဲ လိုချင်တာထဲက တစ်ခုဆို ကျနော် မျှော်လင့်နေတာ ငါးနှစ်လောက်တောင် ရှိခဲ့ပါပြီ။ အဲလို သက်တမ်း ကြာလာတဲ့ နောက်ပိုင်း ကျနော် သတိထားမိတာ တစ်ခုရှိတယ်။ ကျနော့်အတွက်ဆို... လိုချင်တဲ့အရာဟာ လက်ထဲမှာ မရှိတာကြောင့် စိတ်ပင်ပမ်းရတာထက်၊ အဲဒီ လိုချင်တဲ့အရာကို ရကို ရရမယ် ဆိုပြီး အချိန် အကန့်အသတ်နဲ့ ကြိုးစားရတာဟာ ပိုပြီး အဆတစ်သန်းလောက် စိတ်ကို ပင်ပမ်းစေပါတယ်။

ဥပမာ... နောက်မှ အေးအေးဆေးဆေး လက်ထဲမှာ ငွေအပိုလေး ရှိမှ ဝယ်တဲ့ ဂစ်တာလေး တစ်လုံးကတော့ ဘာသံထွက်ထွက် နားထောင်လို့ နားဝင်ချိုနေတဲ့ ဂစ်တာလေး တစ်လက်ပေါ့။ နောက်လ အတွင်းမှာ ဂစ်တာ တစ်လုံး ဝယ်နိုင်အောင် လုပ်ကွာ ဆိုပြီး ကိုယ့်ဟာကိုယ်ဖြစ်ဖြစ်၊ သူများက ဖြစ်ဖြစ် ဖိအားတွေပေးလို့ မြန်မြန် ရလာတဲ့ ဂစ်တာကတော့ ရလာတာနဲ့ တံတွေး ထွေးပြီး ရိုက်ချိုးချင်စရာ ကောင်းတဲ့ ကျက်သရေတုံး ဂစ်တာလို့ ခေါ်မလားပဲ။ ကျနော့်စိတ်ထဲမှာတော့... "ဘာဖြစ်လဲ... အေးဆေးပေါ့ဗျာ..." ဘဝဟာ တစ်ဖက်က ကြည့်ရင် တိုတောင်းတယ် ဆိုပေမဲ့ တစ်ဖက်က ကြည့်တော့လည်း ရှည်လျားပါတယ်။ ရှည်လျား ထွေပြားတဲ့ ဘဝမှာ မနေမနား သွားနေရရင် မြန်မြန် မာလကီးယားဖို့ နီးတော့ ပိုလို့ တိုတောင်းသွားမှာပေါ့။

တိုတိုလေး ချုပ်ရရင်တော့ ဒီသုံးလဟာ တံတွေးနဲ့ ထွေးပြီး ရိုက်ချိုးချင်စရာ ကောင်းတဲ့ အရာတွေချည်းပဲလို့ပဲ ပြောရမယ်။ မရှိမဖြစ် လိုအပ်သည်လို့ ခေါင်းစဉ် တပ်ထားတာတွေ ပြည့်စုံအောင် ကြိုးစားနေကြရလို့ တစ်မိသားစုလုံး အင်မတန် အလုပ်များ နေခဲ့ကြတယ်။ အမေရိကမှာ ဒါက ပုံမှန်ပဲလို့ ပြောကြကြေးဆို ကျနော့် ဘဝမှာလည်း ကျနော့် အမေ ဒီလောက် အလုပ်ပိတာ တစ်သက်မှာ အမေရိက ရောက်တဲ့ အခုမှ မြင်ဖူးတယ်လို့ ပြန်ချေပရမှာပဲ။ ကျနော်ကတော့ မိဘတွေထက်၊ ကျောင်းတက်နေကြပြီ ဖြစ်တဲ့ အငယ် နှစ်ယောက်ထက် စာရင် တော်တော်လေးကို အားအားယားယား ရှိနေတယ်လို့ ဆိုရမယ်။ အလုပ်ကလည်း တစ်ပတ် နှစ်ရက်ပဲကိုး။ အဲဒါကလည်း ဒီလ အတွင်းမှ စတာပါ။

ဒါပေမဲ့ ကျနော် ဟိုဟာယူ၊ ဒီဟာယူ၊ ဟိုကတ်လုပ်၊ သည်ကတ်လုပ်၊ ဟိုဟာလုပ်တာသင်၊ ဒီဟာလုပ်တာက မတတ်ရင် မဖြစ်ဘူး လိုက်ကြည့်ထား ဆိုတာနဲ့ အလုပ်ရှုပ်နေတဲ့ ကိုယ့်ဟာကိုယ်ရော၊ တစ်အိမ်လုံးကိုရော ကြည့်ပြီး စိတ်ထဲမှာ အင်မတန်မှ မသိမသာ ဖိစီးနေခဲ့တယ်။ အခုဆို တစ်အိမ်လုံးဟာ လူချင်းဆုံရတဲ့ အချိန်က ညပိုင်းလေး လောက်ပဲ ဖြစ်နေတယ်။ ကျနော် တစ်ယောက်တည်း အိမ်မှာ ကျန်ခဲ့တာကတော့ အသားကျနေတာပါပဲ။ ဒါပေမဲ့ ကျနော့်စိတ်ထဲမှာ ဘာကြောင့် အဲလောက်အထိ အလုပ်များနေကြတာလဲ... ဘာလို့ ဘဝမှာ အရင်လို သက်တောင့်သက်သာ မနေနိုင်ကြတော့တာလဲ ဆိုတာကို ကိုယ့်ဟာကိုယ် မေးရင်း ခေါင်းထဲမှာ ကိုက်ကိုက်လာမိတယ်။

အခု ပုံမှန်လည်နေတဲ့ ကမ္ဘာကြီးက မြန်မြန်များ လည်ပတ်ရင် အားလုံး ကမောက်ကမ ဖြစ်ကုန်မယ် ဆိုသလိုပဲ အေးအေးဆေးဆေး လုပ်လေ့ရှိတဲ့ ကျနော့် ဘဝထဲမှာ အဲလို မြန်မြန် မြန်မြန်နဲ့ လောဘတကြီး လုပ်နေရတာတွေဟာ တော်တော်လေး ကမောက်ကမတွေ ဖြစ်လာတယ်။ ကံဆိုးရင် အမေရိကမှာ တစ်သက်လုံးတောင် နေသွားရမဲ့ ဘဝမှာ လုပ်စရာရှိတာတွေ အကုန်လုံးကို အခုတစ်လ နှစ်လ အတွင်း တွန်းလုပ်နေကြတော့ နောက်နှစ်တွေမှာ ဘာတွေ လုပ်ကြတော့မလဲ... ကျနော်ကတော့ ဂိမ်းဆော့လိုက်၊ အလုပ်သွားလိုက်၊ ကျောင်းတက်လိုက်၊ တခါတလေ အပြောင်းအလဲ ဖြစ်ချင်ရင်၊ ဆံပင်သွားညှပ်ခံလိုက် အဲလိုပဲ နေရတော့မယ် ခန့်မှန်းတာပဲ။ :D

ဒီရက်ပိုင်း အတွင်းဆို ကျနော် ဘယ်သူ့ကို ဒေါသထွက်ချင်မှန်း မသိ ဒေါသ ထွက်ချင်နေခဲ့တယ်။ ဘေးနားမှာ အသံ ဆူဆူ ညံ့ညံ့ ကြားတာနဲ့ နိုင်တဲ့လူတွေဆို အော်ငေါက်ချင်သလိုလိုနဲ့။ အမေ စိတ်ရှုပ်ရင် ဘာမှ မဆိုင်ပဲကို အပြောခံရတာမျိုး ကျနော်လည်း သဘောမကျတော့ အငယ် နှစ်ယောက်ကို ကိုယ်ချင်းစာပြီး စိတ်ထိန်းထားပါတယ်။ အဲဒီတော့လည်း စိတ်ထဲမှာ တစ်ယောက်တည်း ဒေါသတွေ ထွက်နေပြန်ရော... ဗြိတိန်က တယ်လီဖုန်း ရုံလေးလို ကိုယ့် ကွန်ပျူတာ နေရာလေးကိုပဲ လေးထောင့် နံရံလေးနဲ့ ကာပြီး သီးသန့် ထွက်နေချင်ခဲ့တယ်။ အဲဒါနဲ့ အာရုံကို စုထားလို့ရတဲ့ ဂိမ်းတွေ လှိမ့်ပိမ့်ဆော့တယ်။ ဒီရောက်ပြီး ကာလအတွင်း အခု မတ်ခ်ျလဟာ ကျနော် ဂိမ်း အဆော့ဖြစ်ဆုံး လပါပဲ။

ပြောချင်ရာ ပြောပြီး ရောက်ချင်ရာတွေ ရောက်တယ်ဗျာ... ကျနော်လည်း ဘာဖြစ်မှန်း မသိဘူး။ ကျနော် အတတ်နိုင်ဆုံး ကိုယ့်ဟာကိုယ် စဉ်းစားပြီး ကောက်ချက် ဆွဲတာကတော့ ဖိအား သိပ်များနေသလိုပဲ၊ အဲလိုပဲ ခံစားမိတယ်။ ကျနော်တို့ မိသားစုကို အကြံပေးတာတွေ၊ လုပ်သင့်တာတွေ ပြောပြတာတွေ၊ အမျိုးမျိုး အဆင်ပြေအောင် ကူညီကြတာတွေ အားလုံးကို ကျနော့် မိဘတွေက ကျေးဇူးတင်သလို၊ ကျနော်လည်း ထပ်တူ ထပ်မျှ ကျေးဇူးတင်တယ်။ တခြား တစ်ဖက်မှာလည်း... အများသူငှာ အမေရိကမှာ ရောက်ပြီး ဘယ်လောက်အကြာမှာ ဘယ်လို သူဌေးတွေဖြစ်၊ ဘယ်လို အိမ်ပိုင်တွေ ဝယ်နေကြပေမဲ့ ကျနော်ကတော့ အေးအေး ဆေးဆေးပဲ လုပ်ချင်မိတယ်။ အင်္ဂလိပ် စကားတောင် မြန်မြန် ပြောရင် နားမလည် သေးတဲ့ အချိန်မှာ မြန်ဆန်တဲ့ အမေရိကကို အသားကျပြီး သူတွေက ကျနော်တို့ကို ဖြစ်သင့်တာတွေကို လမ်းညွှန်တဲ့အခါ မြန်မြန်ကြီး မဟုတ်ပဲ နည်းနည်း နှေးပေးရင် သိပ်ကောင်းမှာပဲလို့ စိတ်ထဲမှာ တွေးမိပြန်တယ်။

တကယ်တော့ ကျနော် တစ်ယောက်တည်းပဲ အဲလို မြန်နေတယ်လို့ တွေးမိတာ ဖြစ်မှာပါ။ မိသားစုထဲက အခြားလူတွေကတော့ အဆင်ပြေပြေ ဖြတ်သန်းနေကြပုံ ပေါ်ပါတယ်လေ...